ماذا ستقول مصر اذا نطقت وتكلمت ....

زائر

أولا مصر هاتقول لنا جميعا كل سنه وانتم طيبين بمناسبه السنة الجديدة أعادها الله علينا بالخير والبركات

وبعد هل على طول هاترمى الورقه اللى فى إيديها وتقرب من الميكروفون من بقها وتعمل صوت غريب يشبه الى حد كبير صوت فرامل العربيه وهى طالعه امريكانى وهاتصرخ وتقول إيه بأه هتعملوا فى إيه تانى يا ولاد ال.... وبعدها ترجع وتعيد حساباتها وتفتكر إن شرط الكلام إنه يكون من غير قلة أدب وعليه هاتمسك مصر الورقه من تانى , وتعدل النظاره على عينيها وتستكمل كلامها قائله:

أعزائى وأبنائى المصريين ... أنا أمكو وأسمحولى لى أشكركم على الاغانى الحلوة اللى عملتهوها لى على مر السنين والعصور .. بس أسمحولى أسألكوا بالمرة .. هو أنتوا معندكوش غير الاغانى .. لما تتهزموا تغنولى .. لما تنتصروا تغنولى .. لما تنتخبوا تغنولى ..لما تطلع عينيكوا من الزهق والقرف برضه تغنولى .. إيه الرخامه بتاعتكوا دى .. كله غنا غنا مفيش رقص خااالص ؟

أنا مصر اللى هى أغلى أسم فى الوجود واللى هى ست الدنيا واللى هى النيل من هنا والخير من هنا مش عارفه اقول لكم إيه النهاردة بمناسبة إنى هأتكلم وياترى لو أتكلمت براحتى هيسبونى زى ما أنا مصر ولا ممكن أتحول فجأه الى الصومال .. ياترى هاينفع إنى اشتم ولادى ولا أدعى عليهم وأكره اللى يقول أمين .

أنا مصر اللى ولادى بنوا الحضارة وقهروا الهكسوس وهما برضوا برضه اللى زرعوا بالكيماوى , وهربوا فلوسى بره وحرقوا المبدعين من ولادى على أرضى .. أنا مصر اللى كان أسمى أرض الامن والامان والنهاردة بأصحى مفزوعه من نومى على حوادث شرم الشيخ وتفجيرات طابا وغيرها .. أنا مصر اللى كانت شمسى أحلى شمس وهوايا أنضف هوا مش قادرة أستحمل ريحة السحابه السوداء , فى جيوبى الانفيه ولا قادرة أتنفس أصلا من دخان شكمانات الميكروباصات وأتوبيسات النقل العام .. أنا مصر اللى كنت بأفطس من الضحك لما بأتفرج على أفلام نجيب الريحانى و عبد السلام النابلسى وإسماعيل يس والنهاردة بأفطش برضه من الضحك على إفيهات الوزراء وهما بيتكلموا عن انجازاتهم الكثيرة فى الجرايد !

كل دة وعايزنى أتكلم بأدب .. كل دة وعايزنى أحافظ على لسانى .. كل دة وعايزنى ما أقلبهاش على دماغكو .. لأ دة أنتوا جبابرة بأه !ة

الصراحه يا جماعه من حقها انها تعمل اكتر من كدة كتر خيرها ,,, مستحمله الهم والغلب طول السنين دى عادى يعنى لما تنفس عن همها شويه .

وياترى ممكن مصر تقول إيه أكتر من اللى هى قالته لو أتكلمك فعلا ؟

الصراحه حيبقى عندها حق لو عملت فينا أى حاجه .. محدش يلومها .

وعظيمه يا مصر يا أرض ال..... ولا بلاش أحسن مصر تزعل

eeh ya 3am el7aflla ely masr 3amlaha de w meklfa nafsha feha

زائر

mashe ya 3m mego

we thanks 3ala el moror

نجم عدد الرسائل : 17 تاريخ التسجيل : 18/01/2007

ياعيني يا مصر شايلة كل ده في قلبك و مش قولتي من زمان
طب كنت تقولي و انا كنت هقلك

ارمي حمولك عليا و انا اشيل عنك شويه يا مصر يا اغلى عندي من كل الدنيا ديه

و ميرسي ع الموضوع يا باشا

thankoooooooooooooooz ya 7oda 3la el topic el gamed dah :D